الغباء يعيد نفسه !

SOS : واالله يا ريم اكتشفتلك انو هالتاريخ يعيد نفسه فعلاً.

reeemty: اكتشاف عظيم والله بس كيف وصلت لها النتيجة .

SOS: من شي سنتين كنت ماشي بطريق و فجأة وقعت بجورة وانكسرت و بقيت مجبر رجلي شي شهرين لحتى اتعافيت .

reeemty: له له سلامتك وبعدين ؟

SOS: من يومين رجعت مشيت بنفس الطريق و رجعت وقعت بنفس الجورة و رجعت انكسرت نفس الكسر بس عالجتها هالمرة بسرعة لأنو صار عندي خبرة بكسور الحفر شفتي بقى كيف التاريخ بيعيد نفسه ؟

reeemty: لا مو هيك القصة فيك تقول الغباء يعيد نفسه لأنو مافي غير الغبي اللي بيوقع بنفس الحفرة مرتين

SOS: لا يا ستي مو غبي . انا كنت بعرفه للطريق و متوقع اوقع بالجورة بس هوي الطريق سحبني لحتى امشي فيه !!

reeemty: هلأ فهمت معناها الحق على الطريق ، بس معقولة نفس الطريق ونفس الحفرة ؟

SOS: وحياتك كلو نفسو كأنو عم عيد السيناريو اللي صار من سنتين.

reeemty: يا الاهي ع الغباء .

SOS: هاد مو غباء هي شجاعة ، لأنو كنت بعرف اني رح اوقع بس ما خفت و كملت طريقي .

reeemty: اي هونها على حالك يا عمي الشجاع بس ما تبليه للتاريخ و تقول انو عم يعيد نفسه.

SOS: مو احسن ما اطلع واحد من اغبياؤه لها التاريخ .

reeemty: وكيفا رجلك عم توجعك يا خبير الحفر .

SOS: لا والله هالمرة مخي عم يوجعني .

reeemty: يا حزرك المرة التالتة رح ترجع توقع ؟

SOS: والله مابعرف معقولة ارجع عيدا ؟!

—————————————————————————————–

هل يعيد التاريخ نفسه فعلاً أم أننا نكرر أخطاءنا والتاريخ بريء منا ؟

دع اليأس .. و احتفظ بالتشاؤم !

Awakening: التفاؤل أو عدمو بيتوقف ع طبيعة الانسان أو ع الظروف اللي مر فيها
reeemty: انا بتبنى دائما الاستراتيجية التشاؤمية

Awakening:

reeemty: لانو اذا زبطت الامور الواحد بنبسط اكتر و اذا ما زبطت بيكون متوقع الفشل

Awakening: و الله أنا صرت متشائمة لأنو ما في شي حواليكي بيدعي للتفاؤل

Awakening: بدءا من الأشخاص اللي منثق فيهم

reeemty:بس في شي اسمه تفاؤل و تشاؤم وفي شي اسمه يأس و أمل

reeemty: انا ما بيأس ابداً  بس متشائمة دائماً

Awakening: انتي طفرة على جميع الجهات

reeemty: لأ عن جد

reeemty: يعني ما تيأسي من المحاولة لانو ما عندك حل تاني غير انك تحاولي وترجعي تحاولي ، بس خليكي بكل المحاولات متشائمة

Awakening: بس الواحد وقت بدو يحاول لازم يكون عندو دافع

Awakening: و وقت بدو يكرر المحاولة و ما يلاقي نتيجة بيفقد حتى هالدافع

reeemty: عندك حل تاني ؟؟  هاد أعظم دافع