خارطة الطريق إلى “سوق المدينة” في حلب

7 سبتمبر 2009

لا أعلم لماذا كنت أشعر بلهفةٍ شديدةٍ لزيارة الأماكن القديمة و الأسواق الشعبية في هذه الصيفية . ربما لأنني مللت من حداثة و رتابة “المولات”وبرودتها الاصطناعية و من انعدام الحياة فيها . .

هذه التدوينة ستتحدث عن سوق المدينة الشعبي في حلب.

في البداية شاءت الأقدار أن أختار تاكسي لينقلني إلى تلك المنطقة المزدحمة بشكل غير طبيعي وعند وصولي كان أول شيء قمت بشرائه بعد نزولي من التاكسي هو “طاسة رعبة “مع قليل من الماء لكي تخفف عنا الأهوال التي نجونا منها في طريقنا الى السوق مع التاكسي اللي كان عم يلعب على دمنا وهوي عم يسوق. icon_surprised

15072009221_2

بداية الرحلة كانت في الجامع الكبير و مقام سيدنا زكريا عليه السلام و مع دخولي للمسجد قررت أن أصلي ركعتين تحية للمسجد . ليفاجئني إمام المسجد بعبارة ” ممنوع الصلاة يا اختي” icon_evil !! لم استوعب تماما ما قاله لي و ظننت أنه يمنعني من التصوير في البداية قبل أن يكرر الجملة على مسامعي مرة أخرى. بعد ذلك نبهني أحد الموجودين أن الصلاة “للحريم” تكون في المسجد المخصص لهن.

ومن المسجد بإمكانك النفاذ إلى السوق من أحد الأبواب. وهو عبارة عن سوق مغلق يحتوي على خانات متخصصة بالمنتجات المختلفة ومنها سوق الصابون و سوق السجاد و سوق القماش و سوق اللحمة و سوق للأوشحة وسوق للدهب و للنحاسيات  .. هذا ما مررت به و أعتقد أنه لازال هنالك الكثير غيره في هذا السوق الذي يعتبر الأقدم في حلب و ربما في سوريا حيث يعتبر تجمعًا لتجار حلب القدماء “الميكنين” .

12082009327

ربما رددت كلمة  شكرا خمسين مرة  في هذا السوق أمام كل صاحب محل يعرض علي بضاعته قائلا “اتفضلي.. اتفضلي .. اتفضلي..” لكي تنبهني فيما بعد أختي بأنو “مافي داعي لكل هالتوجيب مع البياعين لانو رح نسحبا لآخر السوق و هني على كلمة اتفضلي” .. بعدها سكتت تماما. smile_zipit

أعتقد أن هنالك فرق لا أعلم سببا له بين حلب والشام . الناس هنا في حلب يمارسون عادة التحديق بشكل مفرط – مزعج – في المارة . كما أن مظهر الكاميرا لم يكن مألوفا حيث واجهتني بعض الاعتراضات عليها  على العكس تماما من أسواق الشام القديمة حيث تجد أن بعضهم قد يبتسم للكاميرا اذا كان من ضمن المشهد الذي سيتم التقاطه . وربما كانت مجرد مصادفات حدثت معي.

للتسوق هنا قواعده المختلفة نوعًا ما . فإذا كنت تنوي أن تشتري شيئا فعليك أن تتعلم فن “المفاصلة” فعندما تسأل عن سعر السلعة التي ترغب بشرائها عليك أن تبخس سعرها الى النصف مباشرة ، ومعظم الصفقات الرابحة تتم عندما تدير ظهرك مغادرا بوابة المحل معرضاً عن الشراء حيث يتقلص في لحظتها سعر البضاعة إلى رقم لم تكن تتخيله.

إذا كنت لا تنوي الشراء بشكل مؤكد فلا تتهور و تطلب من صاحب المحل أنو ينزلك شي من بضاعته منشان ما تسمعلك كلمة متل “اذا مابدك تشتري ليش عم تعذبنا” icon_frown . واذا سمعتها مشيها الله يرضى عليك.. إنت طالع مشوار مو منشان تتخانئ. وطبيعة الشعب هون عصبية زيادة عن اللزوم وخلئهون ديئ .. والواحد مو متحمل حالو.

15072009275

أحد أبواب سوق”المدينة” قادنا إلى منفذ خارجي يطل على قلعة حلب. لكي تدب الحماسة فينا فنشد رحالنا إليها  ولم يكن في حسباننا أننا سنصعد عددا من الدرجات مساويا لشعر رأسنا .

دخلت أحد السجون المرعبة في قلعة حلب حيث يتوجب عليك النزول عددا غير منتهي من الدرجات لتصل إلى مكان بارد جدا مظلم تملؤه الرطوبة و تشعر بانقباض قلبك بمجرد الدخول إليه . إنه سجن “حبس الدم “. لم تكن إلا لحظات حتى فررت مهرولة من هذا المكان المريع. أعتقد أن السجناء في هذا السجن لم يكن يمتد العمر بهم لكي ينهوا فترة حكمهم  فالموت رعبا سيكون الأقرب إليهم. لحظتها تذكرت كل الظالمين الذين مروا بي في حياتي و اشتهيتن بها الحبسة .😎

إلى بقية الصور

12082009322

15072009218

15072009223

15072009262

15072009268

15072009272

15072009273

15072009274

15072009277

12082009324

12082009323

Add to FacebookAdd to DiggAdd to Del.icio.usAdd to StumbleuponAdd to RedditAdd to BlinklistAdd to TwitterAdd to TechnoratiAdd to Yahoo BuzzAdd to Newsvine

20 تعليق “خارطة الطريق إلى “سوق المدينة” في حلب”

  1. ناسداك Says:

    يقال بأنو سوق المدينة بحلب اطول سوق مسقوف بالعالم وفيو خلتات وفوتات الله عليم وين بتوصلك

    بالمناسبة خطأ مطبعي صغير وهو مقام سيدنا زكريا ( يرجى حذف هذا السطر والتعديل )

    بالفعل شعب حلب روح قلبو يبحلق ويستغرب من اصغر شي غير مألوف بالنسبة الو بالعكس هالشي بالشام ابدا ما شفتو وكيف بتلاقي بياع السوس مبسوط والاجانب عم يتصورو معو هالشي بالحميدية

    حلوة الصور🙂

    • ريـــم Says:

      فعلا الطلعات و الدخلات اللي فيه من كتر مو كتيرة بتخوف..
      أما المقارنة بين سوقي المدينة و الحميدية ما كانت لصالح حلب بجميع المقاييس .. بس ما حدا يزعل

      في مقام لسيدنا زكريا بالجامع بس كمان في مقام للرسول عليه الصلاة و السلام على ما اذكر حاطين فيه شعرة و يمكن سكين من أثره
      بهاد المكان اللي بيكون بمواجهة الباب الرئيسي على اليسار .. مابعرف اذا اللي فهمانتو كان غلط
      (مزبوط كلامك المقام لسيدنا زكريا و على ما فهمت انو فيو شعرات من أثر الرسول صلى الله عليه و سلم تم التعديل و ألف شكر على التصحيح )

      أهلا بك ناسداك .. نووورت كالعادة 🙂

  2. goury tec Says:

    مابعرف كل مرة بدخل فيها جامع سيدنا زكريا بحس رهبة المكان المقدس
    اللي شعرتها يوم رحت على العمرة شي غريب بينتابني

    أما أسواق المدينة الداخلية فبحس بمتعة مابعدها متعة عند أتجول فيها
    يعني مابعرف هيك بتحسي إنك تركتي صخب الحداثة وصرعة زمامير السيارات وعجئة الشوارع
    المليئة بالسيارات وانتقلتي لزمن آخر زمن بينقلك لعراقة الماضي وتراثه وما لهذا الموقع
    من أثر في الحياة الاقتصادية لحلب على مر الزمن

    أما بالنسبة لكلامك عن الباعة معك حق بس مو الكل هيك
    بعدين شعبنا وبتعرفيه فضولي وبينظر لكل شغلة غريبة باندهاش
    بقى كيف إذا حاملة كميرة ونازلة تصوير لك إذا الشب بيحمل كميرة وبينزل بيصور
    بيستغربوا بقى كيف إذا صبية
    وعلى سيرة أنا مرة كنت عما صور قاموا فكروني سائح أجنبي وصار يقللولي well come
    قمت سحبتها عليهم وصرت حاكيهم بالإنكليزي وهنن ما فهمين شي والكلمة الوحيدة على لسانهم وكرروا يمكن شي 15 مرة well come

    ريم عن جد مواضيعك كل يوم فيها تميز وبراعة في طرح المواضيع وانتقائها
    أنتي خسارة كبيرة لسيسما ومنتمنى رجعتك قريبا

    سلمت يداكي موضوع حلو كتييير

  3. رجل من ورق Says:

    تقبلي مروري

  4. Emad Says:

    هلأ هيي الاسواق حلوه بشكل عام والقلعه احلى واحلى بس الشعب احلى من الاتنين

    يعني لازم توافقيني وقت بكتب على هيك نمر من شعبي العظيم

    على فكره انا اشتغلت شهرين كاملين بسوق المدينه نفسو وتاري حتى المشي فيه الو اصول

    شغله كبيره عم بقللك

    مواضيعك حلوه
    الله يوفقك

  5. لبنى Says:

    جولة ممتعة جدا
    وساخرة كذلك ؛)
    لم يتسن لي زيارة حلب قبل الان لظروف كثيرة..
    لكن امل زيارتها في اقرب فرصة ممكنة..
    شكرا لك ريم
    بالتوفيق

  6. علوش Says:

    الشام بحسها متعولمة بشكل كبير، يعني فيها غرب كتير، يعني من الطبيعي انو نشوف أجانب بالشام وحتى نشوف سوريين من كل المحافظات، بتذكر لما أطلع بباصات الشام كنت شوف كل يلي يطلع يسأل الشوفير وكأنه أول مرة الو بالشام.

    حلب كلها مقيمين، وجو حلب من يوم يومها محافظ كتير وتقليدي، وما كتير في تقبل للانفتاح، لذلك الغريب فوراً بينعرف بحلب رغم انو عدد سكانها فوق الـ 3 ملايين.

    قصة البحلقة هي من الضرورات في حلب وخصوصاً اذا كنتي صبية، إذا ما حدا بحلق وفنجر عيونه فيكي ما بتكوني بحلب، في نوع من الاحساس انو واجب مقدس البحلقة، ويلي ما بيبحلق معناتها فيو شي غلط، لأنو بعمرنا ما شفنا بنت عم تصور بالكاميرا!.

    أنا نفسي لما نزلت أصور بالقلعة ما سلمت من البحلقة، فعادي، خديها بروح رياضية.

    وعلى قصة ضيق الخلق، كمان صحيح هل الحكي، من لما بطلع من البيت لأرجع عليه الكل عم يغلي دمه، والكل شادد عصبه، ليش ما بعرف!، يمكن أعلى معدلات الحوادث وأعلى معدلات الانتحار في حلب بيعطي نوع من الاجابة.

    بس بالنسبة الي عادي، يعني تأقلمت مع الجو وصرت أتعامل معو بايجابية، في النهاية حلب بالنسبة لي غير، الشغلة يلي بحبها بحلب انها عم تغلي غلي، يعني النشاط فيها ما شفته ولا بمدينة تانية بكل سوريا، وبيقولوا حضارة المدن من عمرانها، وعمار حلب بحد ذاته تحفة فنية بكل معنى الكلمة.

    تحياتي.


  7. يبدو أن رحلتك كانت ممتعة ولكن يشوبها بعض المنغصات وعلى فكرة لايوجد رحلة كاملة ولكن بمجرد أن نشم عبق الماضي ننسى الحاضر بكل ثقل ظله .جولتك بحلب القديمة أقوم بها كل فترة لتعريف الأولاد بدمشق القديمة تحياتي.

    • ريـــم Says:

      ابني كان مرافقا لي في الرحلة ايضا .. في سوقي حلب و دمشق
      واعتقد انه استمتع باكتشاف الاماكن الجديدة بالنسبة له

      شكرا لمرورك

  8. حمزة Says:

    إشو ريم …
    كني عم تعملي حملة تسويقية لحلب القديمة ..

    تصدقي بيلبقلك ……… دليل سياحي .

    تحية

  9. دعدوشة Says:

    لحلب عطر خاص يميزها عن كل مدن سوريا

  10. دعدوشة Says:

    لحلب عطر خاص يميزها عن كل مدن سوريا
    ولها بريق ينقلك بلحظة الى قلب الماضي
    ماشاء الله عليك ريم نقلتيني لهنيك وحسيت الناس عنجد عم بتبحلق عليي انا مو انتي🙂


  11. أتمنى الذهاب الي سوريا (بلدي الأم) وزيارة هذه الأماكن🙂


  12. استمعت بالرحلة ، و شعرت أني معك بتلك الصور الجميلة
    اشكرك من قلبي

  13. خلف Says:

    لما تكون “فسط” حلب ما تبطل تتأفف منها ومن ناسها و… اذا كنت من أهلها وطالع وشايف الدنيا ولا زائر.. بس لما تبعد شوي بيصير كل شي فيها حلو .. من بعيد شوي تقدر تشوف الجوهري فيها وبظن كتير بينحب.. ما بصير نعامل حلب كأنو هي الشام أو دبي أو اثينا … لانو مختلفة اكيد. حلب دافية كتير تخطيط المدينة القديمة -والجديدة حتى- فيها دفء فيها حميمية حتى لو كنت غريب ما بظن بحلب تخاف تضيع مثلا بس بغير مدن تفكر بهيك.. جقرين ومدهوشين من كل شغلة بس والله حلوين.. أهلها معتبرين حالن خرطن الخراط وقلب ومات ومعتبرين حالن “ششنة” بس هاد مستوى أول من التلقي وهني بيعملو قشرة حولن تبدو صلبة الاختراق… لكن هي بسهولة تتداعى وتنفد الى الجوهري والجوهري في حلب هو متل مدينتها القديمة شي الو ريحة دااااااااافية شي ملمسو متل المطر… بحلب فيك تمشي باي وقت تغسل قلبك بالمشي وتعطر حزنك بريحة الغار أو اذا كنت فرحان تشوف الابنية تضحك… ياااااالله عم ابكي اشتقتلها كتير.. سكنت مدن كثير بس من يسكن حلب ستسكنه ولا يشتاق الى غيرها… حبيت تدوينتك كتير

  14. travelled Says:

    السلام عليكم و رحمة الله و بركاته
    اختى الكريمة
    لى استفسار بخصوص حلب
    اريد ان اشترى المفارش المطرزة
    من اين استطيع ان اجدها فى اسواق حلب؟
    لكى جزيل الشكر

  15. travelled Says:

    السلام عليكم و رحمة الله و بركاته
    اختى الكريمة
    هل توجد محلات بالتحديد داخل سوق المدينة يمكننى التوجه إليها مباشرة؟
    هل لديك معرفة من اين يمكن اخذ باص من حلب الى العقبة اﻷردن؟
    جزاكى الله كل الخير

  16. mona Says:

    مااروعك.ومأروع حلب الشهباء


أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: