واجب تدويني .. “الأسرار”..!

اول شي بدي قول شكراً لـ لبنى اللي مررت هالواجب التدويني لإلي ،

المطلوب في الواجب هو كالتالي :

“ أن تذكر ستة أسرار لا يعلمها الآخرين عنك ، و أن تقوم فيما بعد بتمرير الواجب إلى ستة مدونين آخرين “.

ما رح نختلف انو الاسرار بس تطلع بره اتنين بتصير مشاع ، و بالنسبة إلي بس تطلع بره نفسي بتحترق ، منشان هيك رح اعتبر ما سيتم التصريح عنه معلومات قد تكون  خفية ، ومابعرف اذا الواجب لازم يتضمن الصفات السلبية فقط لانو اذا هيك معناها مارح يبقى حدا يفوت على هالمدونة بعد اليوم .

رح ابدا :

1- مسالمة جداً :

بس مابعرف ليش بلاقي حالي بالصدفة البحتة بنص المشاكل دائماً ، يمكن انا بحاجة لمزيد من تدريبات ضبط النفس و تخفيض نسب الأدرينالين التي تؤدي إلى سرعة الاشتعال .

———————————

2- و بحب الناس الرايقة اللي بتضحك على طول 8)

اللي متلي ، يعني اللي بيقدرو يخلقوا شي يضحكوا عليه بنص الأزمة و بأصعب وقت

———————————

3- عندي فوبيا من شي اسمه قعدة بالبيت بين اربع حيطان

مما يجعلني صانع أنشطة و منظم رحلات لا يهدأ إلا أن التنظيمات غالباً ما تنتهي بالفشل و أكيد دائماً  بسبب الجمهور غير المتعاون  😕

———————————

4- بخاف اخد القرارات

و بفضل القرارات هي اللي تاخدني بطريقها (سلبية يعني) ،
بس اذا حصل و اخدت قرار مستحيل اتراجع عنو (تناحة) .

———————————

5- ذاكرتي قوية جداً

لو بفقد نص  ذاكرتي بكل شي فيها منيح و عاطل رح كون مرتاحة و نام بهدوء أكتر.

———————————

6- مترددة و متقلبة 🙄

رأيي ممكن يتغير من الصبح للمسا أو حتى أسرع ، حتى قناعاتي قابلة للتبديل لما بكتشف انها كانت غلط،
بس أكتر شي بياكلها اللي بينزل معي على السوق .

————————————————————————————————-

يمرر إلى المطلوبين أدناه :

1- HumanGraces

2- سيدة الزرقة

3- دعدوشة

4- ناسداك

5- مدونة فضل

6- Mohammad Shackow’s Blog